المقابلة الاولى في موقعنا مع الرابرز العرب للإستفادة من تجاربهم كان لنا نصيب ان نجريها مع الرابر الأردني نزار العضو في مجموعة ميكروفون من دهب mmd والتي حققت نجاحات باهرة في الأردن وخارجها في الفترة الأخيرة
الرابر نزار السامرائي بوالد عراقي ووالدة فلسطينية يجسد طرفي العذاب العربي ما بين فلسطين والعراق والغربة عن الوطن
مقيم في الأردن ويعلم كل من يكلمه إنتمائه الشديد وعشقه للأردن ولحواري العاصمة الأردنية عمان
أجرى معه M1 مقابلة في 27 نيسان وقام الرابر نزار بالأجابة عن اسئلة m1 بكل أريحية وهاهي المقابلة تماما كما جرت
m1 : قبل ما نبلش بأي كلمة وبالعكس تماما من كل المقابلات نزار إنتا بلش إحكي كلمتين
nizar :اول اشي بحب احيي الجمهور السوري, و لكل من دعمنا و ما زال يدعمنا للحظة هاي
m1 : نزار في البداية بدك تحكي كلمة للكل تقول لنا كيف وصلت لهون قدم درس للرابرز الجداد لحتى يوصلو
nizar :

يعني عشان نكون صريحين فش حدا ببلش السلم من فوق, و ولا رابر بطلع من دارو ممتاز, فبصراحة تعبت كتير, و تعبت ناس معاي كتير, يعني ما بقدر انكر فضل الرابر العربي رامي علي لانو كان من اكبر المساهمين بدعمي و تحسين مستواي عبل ما وصلت للمرحلة هون و طبعا اخوي السلم لسا طويل و مشوار الألف ميل ببلش بخطوة.

m1 : نزار أحكيلنا عن أغانيك مع مين تعاملت ؟

nizar : تعاملت مع كتير موهوبين في هاد المجال, و كان التعب الأكبر على الجنود المجهولين زي ما بحكولهم اللي همه مهندسين الصوت بالاستوديوهات اللي كان الهم فضل كبير على تعديل الاغاني على شان تصير بالشكل اللي هيه في. رامي اول انسان آمن بقدراتي, و ضل وراي و لحد اليوم. بالنسبة للناس اللي اشتغلت معهم همه كتار, منهم اخو المطرب طوني قطان, اسامة قطان, رامي, كريم, مشاري, ديفيد, Metaphysical, و كتير ناس يعني صعب احصرهم كلهم, و انشالله رح اشتغل مع مطربين عالميين عن قريب

m1 : إنشاء الله أكيد بنتمنالك التوفيق

طيب نزار إيمت بلشت ؟

nizar : بلشت بنقدر نحكي يعني بال2002, بس سجلت اول اغنية بصيف ال2003

m1 : إحكيلنا عن أكتر شي فرحك بمسيرة عملك أو اكتر شغلة بتفتخر فيها بالمسيرة

nizar :

اكتر من شغلة صراحة, يعني اول اشي حب الجمهور, و بتحس انو فعلا اللي بدك تحكي وصل لعدد من الناس حتى لو ما كانش كتير بس احسن ما تضلك ساكت. و كمان خلاني اتعرف على كتير ناس محترمين جدا من شتى انحاء العالم, و المسيرة هاي اعطتني الفرصة انو احاول انمي او زي ما بحكو اخلي تفكير الشباب ينضج اكتر شوي. و يعني بكفي انو الواحد كان مجرد فرد عادي بالمجتمع و بتعبو و بوجهة نظرو جذب المجتمع الو.

m1 :

إحكيلنا شوي عن مشاريعك المستقبلية وإذا ناوي تضل مع ال mmd وشو مشاريعكم المستقبلية

nizar :

انا خليني اسألك سؤال, لما انت تكون محتاج, و حدا يمدلك ايد المساعدة, و يطعميك, و يدير بالو عليك, و لما انت كنت باسوأ حالاتك كان بجنبك, لما انت تصير منيح و قوي بتقدر تتركو؟ فأتوقع هاد جواب كافي بالنسبة الي و للMMD. بالنسبة لمشاريعنا, حاليا عم بنخطط لأكتر من حفلة بالصيف, و في كتير مفاجئات بالصيف, يعني كل اشي بوقتو حلو.

m1 : ال mmd من أقوى الفرق حاليا على ساحة الراب العربي واكيد رح نشوفلكم مستقبل مزهر

طيب نزار برأيك برأيك وصلنا بالوطن العربي لدرجة وصل فيها الراب العربي ونال الإحترام اللي لازم ينالو ولا لسا؟

nizar : لا طبعا لسا, يعني لسا في عدد كبير من الوطن العربي لما تحكيلو راب عربي بفكرو راي مغربي, او انو مجرد تخويت, لسا نحنا محتاجين وقت و دعم و انوقف كلنا ايد ايد عشان نسوي ثقافة الراب العربي ثقافة تنال الاحترام في كل شارع و كل زقاق من الوطن العربي. لانو نحنا الحقيقة, و نحنا انعكاس الوطن العربي الحقيقي, مش اللي بنشوفو بالفيديوكليبات, بس انشالله رح نوصل لهاي المرحلة, و ما بهم على ايد مين, طالما انو وصلنا هاي المرحلة, سواء انا كنزار و صلت ولا ما وصلت, بس ما دام وصل صوت الحقيقة, فهاد كفاية بالنسبة الي.

m1 : أنا واثق إنو صوت الهيب هوب العربي هو صوت الحق وهو اللي بيعكس الحقيقة بالمجتمعات العربية ومو الفيديو كليبات الحديثة وأنا اكيد إنو طالما في ناس بتشتغل رح نوصل وتوصل الكلمة

طيب نزار إحكيلنا بشكل مختصر عن الراب الأردني والتجربة الأردنية في الراب العربي

nizar : الراب الاردني... قصتو طويلة.. يعني الراب الأردني فعليا هو اول راب بالوطن العربي, بلشو صديق الي بال1993 اسمو ابو يوسف, و انشهر على مدى الأردن, و لسا الناس بتحكي في. بس بعدين انشغل, و بطل يعمل اغاني. فزي صارت صعبة شوي انو بعد ما يقارب العشر سنين يرجع ينبني الراب العربي بيوم و ليلة, طبعا لما رجعت انا, لاقيت كتير ناس عادتني, و كانت ضدي, بس اليوم الحمدالله كتير من اللي كانو اعدائي صارو صحابي و صارو يدعموني و بآمنو فيي, و صار في عدد منيح من الرابرز العرب بالأردن, و لساتنا بأول الطريق زي ما بحكو.

m1 : طيب نزار بالنهاية يا ريت تحكيلنا رأيك بالراب السوري وكيف ممكن نشتغل لحتى نوصل الكلمة للشعب السوري وللعالم العربي بالمجمل

nizar : يعني انا برأيي الراب السوري ما زال بحاجة لدعم, و يعني لازم كلكم توقفوا ايد ايد, و لو كل واحد حكا لصحابو و صحابو ساعدوا, هاي وصلت الرسالة تقريبا للشعب السوري, بس هيه مسألة وقت, يعني المفروض الواحد يكون مآمن بحالو قبل ما يطلب من الناس يآمنو في, لانه ما دام كان مآمن بحالو لو كل الناس حكولوا انو هوه سيء بضل مثابر عبل ما يتقبلو. زي ما كلنا بنعرف بداية عبدالحليم حافظ كانت جدا سيئة و الناس كانو يرمو عليه اشياء بالحفلات, بس اليوم هو على كل اللسان.

m1 : بالأخير بنشكرك نزار على اللقاء وبترك الكلمة إلك لتحكي أي شي يمكن راح عن بالي إني إسألك إياه

nizar : حبيبي شكرا الك, و لموقعكم, بس في نقطة, انو زي ما حكيتلك من قبل, ما في اشي اسمو راب اردني, راب سوري و راب فلسطيني, كلنا راب عربي, و كلنا لازم نوقف ايد ايد.

m1 : أكيد لحنا كلنا راب عربي وبالنهاية إنتشار الراب العربي بسوريا بيفسح المجال للراب العربي بشكل كامل لحتى يفوت على سوريا

اخيرا بشكرك نزار على هاللقاء وبتمنالك التوفيق إلك ولكل الرابرز العرب

nizar :على راسي حبيبي ولو

مواقع نزار :

Www.NiZ-R.com