m1 rapper:الرابر ساد تيرز بأغنية جديدة بعد الإنتظار
اول شي بيشرفنا بموقع الهيب الهوب السوري انو نلتقي فيك
وبدنا تخبرنا قبل كلشي عن ساد تيرز (خصوصيات يعني ) من وين وقديش عمره

sad tears:

أول اشي انا بشكر الموقع الرائع على أنو أستضافني .. وهاد بتأكيد شرف ألي.. تاني أشي انا أسمي أحمد الجيلاني عمري 19 سنه.. ساكن بعمان الأردن.. بس أصلي فلسطيني.. ولقبي هوه ساد تيرز وبيعني دموع الحزن أنا سميت حالي هيك من قبل 3 سنين .. وسبب التسميه أنو دموع الحزن صعبه كتير على الأنسان.. وهاد بيعني أني أنسان صعب أي حدا يوقف بطريقي.. او يمنعني من أداء رسالتي..

m1rapper:

2- اوكي ساد تيرز فينا نعرف ايمت وكيف بلشت?

sad tears
انا بلشت من مده قصيره لكن انا كنت بدي أغني من قبل 3سنين. لكن الظروف كانت تمنع أنو انا أغني... وما بقصد بالظروف الظروف الماليه.. انا بقصد فيها الظروف الشخصيه الي هيه عدم موافقة الأهل .. ونظرت المجتمع للراب بشكل عام.. لكن الظروف بالوقت الحالي تحسنت وقدرت أني أسجل
أغنيه.. وسجلت من قبل 3أسابيع أغنيه بعنوان أخر ايام الدنيا.. وكانت الاغنيه عباره عن مزج بين مشاكلي الشخصيه ومشاكل الشباب بشكل عام..

m1rapper:
3- اوكي كيف كانت البداية شو اللي خلاك تفكر تمسك المايكروفون?

sad tears :
البدايه كانت بتسجيل الأغنيه الي حكيت عنها قبل شوي.. والي خلاني أمسك المايكرفون هوه حبي الشديد للراب العربي.. وكمان اني أقدر أوصل رسالة الراب الهادفه لكل بيت.. ولكل شخص بالوطن العربي.. واني كمان أقدر أدخل جواة احساس الناس وأشاركهم مشاكلهم وأحزانهم .. وأني أعبر عن مشاكل الشباب.. وأحكي عنها بدون خوف..

sad tears:
اتعاملت مع الرابير الأردني a-rوهوه دخل معي باللازمه.. وكان دوروا بالأغنيه انو يرد علي.. يعني انا بحكي مشكله بكل مقطع وهوه بيرد علي بنفس اللازمه..

m1rapper :
5- ساد تيرز كيف بتقيم الأغنية الأولى إلك

بصراحه انا ما بقدر أقيم أغنيتي وأحكي عنها ممتازه هاد الشي بيرجع للي بيسمعني أنو هوه يحكيلي شو رأيو بالأغنيه.. ويحكيلي شو تقيمو ألها.. هل هيه ممتازه أو سيئه...

m1rapper :
6- كيف بتنظر للراب بشكل عام وللراب العربي خصوصا

بنظر للراب بشكل عام نظره الانسان التايه ولقى دليل طريقو.. اما بالنسبه للراب العربي انا بنظره الو أنو اغاني هدفها تغير الناس وتغير كل خطأ بالمجتمع العربي بشكل عام.. وانو لولاه ما كان الواحد ضلو متزكر كل أشي بيصير بأرضه ...

m1rapper :
7 شو الأسباب اللي عم تمنع إنتشار الراب العربي برأيك
الاسباب الي بتمنع من نشر الراب العربي هيه نظرة المجتمع للراب بشكل عام بتنظر ألو بنظره سيئه وبيحكموا عليه أنو سيء من غير ما يسمعوا .. كتير من الناس لما سمعتهم راب عربي أتفاجؤا من المواضيع الي بتنطرح بالأغاني وكتير ناس كانت تحكي عن حالها انو انا مش عربي وما بعتز اني عربي ولما سمعوا أغاني الراب العربي أتغيروا وصاروا يعتزوا انهم عرب...

m1rapper :
8 شو كان نفسك أسألك وما سألتك إياه ؟

sad tears:
بصراحه انتاوفيت وكفيت.. بس كان نفسي تسألني .. ازا بدي أنزل ألبوم ولا لأ... وجوابي بهاد السؤال انو.. حالياً ما رح يكون في طرح ألبوم لأنو انا لساتني بأول الطريق..وانو السلم بنطلع درجه درجه..
وكمان أنا بحب أشتغل على أغنيه وحده وتكون هادفه وأغنيها بأحساس.. احسن من ما أنزل ألبوم بس مجرد اني أعبي كلام على ورق وأغني من دون ما أحس بلي بغنيه..
m1rapper:
9 شو بتقول كلمة لكل اللي سمعوا اغنيتك هلأ عبر موقعنا وبشكل عام لكل رابرز سوريا ؟

sad tears :
بحب أقول أن شاء الله الأغنيه تعجبكم وتدخل أحساسكم ..وانو يكون وصل لالكم شو هدفي من الأغنيه والي هوه اني أحكي عن مشاكل الشباب بشكل عام.. ولا تعتبروها شخصيه... بحب أحكي انو ما في أشي أسمو رابيرز سوريا ورابيرز الأردن في أشي أسمو الرابيرز العرب..
وبحب أحكي لكل رابيرز العرب بسوريا أنو ان شاء الله بيصير عندكم الراب من أفضل أغاني الراب العربي .. وان شاء الله بالتوفيق ألكم..

وبشكر m1 rapper
ألي عمل معاي هاد اللقاء الحلو وبالتوفيق للجميع..